Arestado ang vlogger na si Norman Mangusin, na mas kilala bilang si Francis Leo Marcos, dahil sa pagsusuot ng uniporme ng pulisya at iba pang paglabag, ayon sa National Police Commission (NAPOLCOM) nitong Martes.
Sa kaniyang mensahe sa mga reporter, sinabi ni NAPOLCOM Vice Chairperson and Executive Officer Rafael Vicente Calinisan na ipinatupad ng Criminal Investigation and Detection Group - National Capital Region (CIDG-NCR) ang warrant nang hulihin si Mangusin sa isang hotel sa Pasay City.
"I confirm that the PNP-CIDG-NCR just arrested Mangusin in (a hotel) by virtue of a warrant of arrest issued by the Regional Trial Court Branch 294 of Parañaque," sabi niya.
"Also present were the Pasay City Police and operatives from the NAPOLCOM [Inspection, Monitoring, and Investigation Service]. Tagumpay po ito ng hustisya sa Pilipinas. Crime does not pay. I will visit Mangusin later when he arrives in CIDG," dagdag ni Calinisan.
Noong Pebrero 17, sinabi ng CIDG na iniimbestigahan nito si Mangusin matapos mag-viral dahil sa pagsusuot ng police uniform.
Nauna nang inalmahan ng PNP si Mangusin at binanggit na posible itong masampahan ng reklamo dahil sa "usurpation of authority and illegal use of uniforms or insignia." Sinuportahan ng NAPOLCOM ang imbestigasyon ng PNP kay Mangusin.
Kumalat online ang larawan ni Mangusin na naka-"ceremonial blue" na police uniform.
Sa kaniya namang pahayag, sinabi ni Mangusin na edited ang larawan at ipinakalat online ng mga pumupuna sa kaniya. — VDV GMA Integrated News
