Masipag, mabait, pasensyoso at masigasig sa trabaho. Ganito inilarawan ng mga nakatrabaho sa likod ng camera ang Kapuso at director of photography na si Joseph Delos Reyes, na pumanaw dahil sa COVID-19.
SI Zig Dulay, na direktor ng mga Kapuso series na "Wagas" at "Sahaya," sinabing kapatid na ang turing kay Joseph.
Ang direktor din na si Maikel Cardoz, sinabing "dedicated" at "passionate" sa trabaho si Joseph dahil nais nitong maging isang director of photography.
"Kahit anong shooting, sasabakan niya, kahit na masikip, mainit, mabaho 'yung set. Wala kang makikitang kaarte-arte sa kaniya," sabi ni direk Maikel.
"Joseph was a very invaluable person in my team, I don't think I would have been able to do this film without him," sabi ni award-winning na Director of Photography na si Carlo Mendoza.
"Joseph was a very passionate, genuinely kind-hearted person and he was a great ally," sabi pa ni Mendoza.
"Mabait na tao si Joseph. Madalang na madalang uminit 'yung ulo niya sa set tappos kung iinit man 'yung ulo niya, tatabi lang 'yan sa isang tabi, tapos tahimik lang, gagawin lang niya 'yung trabaho niya tapos mamaya okay na siya," sabi ni Assistant Director Regina Valenzuela.
Emosyonal ang kapatid ni Joseph na si Nica, na inalala ang pagsisikap nito para mapagtapos ng pag-aaral ang kaniyang mga kapatid.
Inalala rin si Joseph ng kaniyang mga kaibigan.
Pumanaw si Joseph dahil sa COVID-19.
Director of Photography si Joseph sa iba't ibang GMA shows tulad ng Wagas, Karelasyon, Dangwa, Tadhana, Sirkus, Sahaya, One Hugot Away at Magpakailanman.-- FRJ, GMA News
