Pamilya ng mga OFW na pinapadalhan ng dolyar, paldo nga ba kapag mahina ang piso?

Muling nakapagtala ng all-time low ang halaga ng piso laban sa US dollar na umabot sa mahigit P61 kontra $1. Ibig sabihin nito, mas malaking halaga ang matatanggap ng mga pamilya ng overseas Filipino workers kapag pinapalitan nila ang ipinapadala sa kanilang dolyar. Pero makikinabang nga ba talaga ang OFW families kapag mahina ang piso? Alamin.

Ayon sa ekonomistang si Carlo Asuncion, karaniwang nakabubuti sa mga pamilya ng OFW ang mas mahinang piso pero panandalian lamang ito.

“Because every dollar remitted converts into more pesos, boosting their purchasing power,” ani Asuncion.

Ngayong Miyerkoles, nabawasan ng 26.7 sentimos ang halaga ng piso matapos magsara sa P61.567:$1 ang palitan. Nitong Martes, naitala ang historic low na P61.300:$1.

Sa unang tingin, maaari umanong isipin na mas makikinabang ang mga pamilyang tumatanggap ng padala mula sa mga OFW na dolyar dahil tataas ang katumbas na halaga nito sa piso.

Ngunit, totoo nga ba ito?

Sa mahinang piso, mas malaki ang matatanggap ng mga pamilya ng OFW dahil ang bawat dolyar na ipinapadala ay nagiging mas maraming piso. Magtutulak ito sa mga tao na gumastos at magpapalakas ng domestic consumption na mahalagang bahagi sa paglago ng ekonomiya.

Nakabubuti rin ang mahinang piso para sa mga freelancer, mga kompanyang nakatuon sa export, at mga business process outsourcing (BPO) firms na kadalasang dolyar ang bayad.

“Yes, a weaker peso by more than 6% since the war on Iran started on February 28, 2026 would benefit OFWs and their families, exporters, BPOs, foreign tourists, foreign investors, and others that earn in U.S. dollars/foreign currencies,” saad naman ni Rizal Commercial Banking Corp. chief economist Michael Ricafort.

Dagdag naman ni Asuncion, na chief economist ng UnionBank of the Philippines, nakatutulong para sa OFW families sa maiksing panahon ang mahinang piso. Gayunpaman, may mas malawak na epekto umano ang galaw ng piso laban sa dolyar—mula sa halaga ng remittance hanggang sa presyo ng gasolina at pagkain, at maging sa mga oportunidad sa trabaho sa export sector.

Makikita naman ang negatibong epekto ng mahinang piso sa pagtaas ng presyo ng mga inaangkat na produkto at serbisyo. Dahil sa mas mahal ang mga materyales mula sa ibang bansa, maaaring itulak nito ang pagtaas ng inflation.

Ayon kay Ricafort, kahit mas maraming piso ang nakukuha sa bawat dolyar na ipinapadala, maaaring matabunan ito ng mas mataas na importation costs na magdudulot ng mas mataas na inflation sa kabuuan.

“Weaker peso would also help increase the peso equivalent of foreign debts of the government and private borrowers,” dagdag ng ekonomista ng RCBC.

Sang-ayon dito si Asuncion, na nagsabing ang benepisyo ng mahinang piso para sa remittance ng OFW ay maaaring mabawasan sa paglipas ng panahon dahil “peso weakness feeds into higher fuel and food prices, so the net gain depends on whether exchange‑rate gains outpace rising living costs.”

Ayon naman kay John Paolo Rivera, senior economist ng Philippine Institute for Development Studies, na bagaman may panandaliang benepisyo ang mahinang piso para sa mga pamilya ng OFW, kapag naramdaman na ang epekto ng imported inflation, “it will erode their purchasing power in the medium to long run.”

“Benefit is not absolute. Impact is mixed which is positive on remittance value but tempered by inflation and broader economic conditions,” sabi ni Rivera. — Ted Cordero/FRJ GMA News