Police general, inireklamo ng NAPOLCOM dahil sa pagsuot ng sapatos na higit P70k ang presyo

Nahaharap ngayon sa administrative complaint ang isang police brigadier general dahil sa alegasyon ng less grave neglect of duty at conduct unbecoming of a police officer, ayon sa National Police Commission (NAPOLCOM).

Sa isang pahayag na inilabas nitong Martes, sinabi ni NAPOLCOM Vice Chairperson at Executive Officer Rafael Vicente Calinisan na nag-ugat ang reklamo sa dalawang insidente laban kay Police Brigadier General Jezebel Imelda Medina, na Health Service director.

Una, ayon kay Calinisan, sinasadya umano ni Medina ng mabigong magsumite ng kinakailangang psychiatric at psychological examination (PPE) report ng isang pulis sa Quezon City.

Inaakusahan ang naturang pulis ng sedisyon sa vlogging activity at hiniling na sumailalim sa psychiatric at psychological assessment.

“Such refusal directly undermines the Commission’s constitutional and statutory authority to exercise administrative control and supervision over the Philippine National Police,” ayon sa NAPOLCOM.

Ikalawa, sinabi ni Calinisan na kabilang din sa reklamo laban kay Medina ang ginawa umanong public display niya ng mamahaling sapatos na nagkakahalaga ng P70,599 habang suot ang uniporme ng PNP.

Ang halaga ng sapatos ay katumbas na umano ng isang buwang basic salary ng isang police brigadier general, ayon sa NAPOLCOM.

“This act raises serious concerns on modest living and ethical conduct, standards required of all public servants and most especially of senior police officers whose actions set the tone for the entire organization,” giit ni Calinisan.

Sinisikap ng GMA News Online na makuhanan ng panig ni Medina at ilalathala ito kapag nakuha na.

Para sa NAPOLCOM, ang integridad, disiplina, at pagsunod sa legal na awtoridad ay hindi optional kundi mga pangunahing tungkulin nila.

“This case underscores the Commission’s firm resolve that rank does not shield anyone from accountability, and that any act that erodes public trust in the police institution will be investigated and addressed in accordance with the law,” ani Calisan. — Joviland Rita/FRJ GMA Integrated News