Apat na mahistrado na kabilang sa mga bumoto na patalsikin si Maria Lourdes Sereno bilang Punong Mahistrado ng Korte Suprema ang kasama sa listahan ng mga nominado sa nabakanteng puwesto sa kataas-taasang hukuman.
Kabilang umano sa mga tumanggap ng kanilang nominasyon bilang punong mahistrado si Associate Justice Teresita Leonardo-De Castro, na nakatakdang magretiro sa Oktubre.
Kinumpirma ng tatlong source, kabilang si Justice Secretary at Judicial and Bar Council (JBC) ex-officio member Menardo Guevarra, ang ginawang pagtanggap ni De Castro sa nominasyon.
Matatandaan na naging mainit ang sagutan nina Sereno at De Castro sa pagdinig ng SC sa quo warranto petition na inihain ni Solicitor General Jose Calida laban sa una.
Sa botong 8-6, inayunan ng mga mahistrado ang petisyon ni Calida na dahilan para mapatalsik si Sereno. (READ: CJ Sereno, pinatalsik ng mga kapwa niya mahistrado)
Maliban kay De Castro, tinanggap din nina Associate Justices Lucas Bersamin, Diosdado Peralta, at Andres Reyes, Jr., ang kanilang nominasyon bilang punong mahistrado.
Bumoto rin sina Bersamin, Peralta at Reyes pabor sa petisyon ni Calida.
Pang-lima sa listahan ng mga kandidato sa nabakanteng puwesto ni Sereno si Davao del Norte Judge Virginia Tejano-Ang.
Nominado rin sa posisyon pero tumanggi sina Acting Chief Justice Antonio Carpio at si Associate Justice Marvic Leonen, na kapwa bumoto laban sa quo warranto petition.-- FRJ, GMA News
