Hihilingin ni Ombudsman Jesus Crispin Remulla sa Sandiganbayan na alisin si dating Department of Public Works and Highways (DPWH) Secretary Manuel Bonoan bilang akusado sa mga kasong kinahaharap nito kaugnay ng umano’y P573 milyong kickback mula sa mga flood control project.
“We already have a side agreement for the cooperation of former Secretary Manuel Bonoan to be a state witness, to be a cooperating witness,” sabi ni Remulla sa isang press conference.
“We will ask the court to discharge him as a respondent so he can testify for us as a state witness,” dagdag niya.
Nahaharap si Bonoan sa kasong plunder na nagkakahalaga ng P573 milyon. Kasama niya bilang akusado sina Senador Jinggoy Estrada, dating DPWH NCR Assistant District Engineer Denryl Caesar Sanchez Cortuna, DPWH NCR District Engineer Manny Bumagat Bulusan, at DPWH NCR District Engineer Arturo Lombres Gonzales Jr.
Kasalukuyang nakabinbin ang naturang kaso sa Fifth Division ng Sandiganbayan.
Kasama rin si Bonoan sa kasong two counts of graft o katiwalian na kinakaharap din ni Estrada.
Walang piyansa sa kasong plunder at kasalukuyang naka-ospital arrest si Bonoan dahil sa mga iniinda niyang sakit.
Kabilang sa sakit umano ng dating kalihim ay diabetes, hypertension, acute coronary syndrome, chronic kidney disease, prostate cancer, at pananakit ng gulugod o spine. – Llanesca T. Panti/FRJ GMA News
