Bumuti na ang lagay ni Calix Ho, anak ni Dennis Trillo, matapos siyang masangkot sa aksidente sa kotse kamakailan.
Sa Chika Minute report ni Nelson Canlas sa 24 Oras Weekend nitong Sabado, ibinalita ni Calix na balik-fencing na ulit siya.
“I've been back to training since last week po and I've been feeling better. I've been feeling really much better. I had a cast lang po tapos I chose the conservative way na lang po kasi I really didn't want to have surgery on it talaga,” sabi ni Calix.
Natanong din si Calix kung nagkaroon ba ito ng trauma sa pagmamaneho.
“No naman po. I just became more aware of my surroundings. Siguro not trauma, pero I learned so much from it,” sabi niya.
Sinabi naman ni Dennis na inalis na ang cast sa kamay ni Calix.
“OK na. Natanggal na ‘yung cast niya and tina-try niya na bumalik ulit sa training,” sabi ni Dennis.
Sa ngayon, naka-break muna si Calix sa pagmamaneho, bilang pag-aalala na rin nina Jennylyn at Dennis sa kaniyang kapakanan.
“Hindi pa ulit nagda-drive. Pahinga muna sa driving. Tutal may drivers naman,” ani Dennis.
“Hindi namin muna pinapayagan,” pagsegundo ni Jennylyn.
Nasangkot sa aksidente sa kotse si Calix noong Mayo.
Anak ni Dennis si Calix sa dati nitong partner na si Carlene Aguilar. Noong Marso, pinangalanan siyang Rookie of the Year sa UAAP Season 88 Men’s Fencing Tournament. — Jamil Santos/VBL GMA News
