Sa darating na Holy Week, mapanonood ang espesyal na programang handog ng GMA Network na eight-part series na “Jesus His Life.”
Sa episode na “Jesus His Life: Judas,” ang tinig ni Martin del Rosario ang magbibigay-buhay sa karakter ni Judas, ang traydor na disipulo ni Jesus Christ.
Sa ulat ni Dianara Alegre sa GMANetwork.com, sinabing ito ang unang dubbing experience ni Martin.
“Kinabahan ako nu'ng una kasi siyempre first time kong mag-dub," anang aktor.
READ: Sanya Lopez, naiyak habang binibigyang-boses si Mary Magdalene sa ‘Jesus: His Life’
“Sa TV kasi, 'di ba, parang hindi masyado ibibigay sa boses kasi uma-acting na 'yung mukha mo. So, parang may self-doubt na OA ba 'yung ginagawa ko,” patuloy niya.
Sabi pa niya, “Bago ito sa akin at sana ma-explore ko din minsan. Malay mo, next time maging dubber pala ako."
Inihayag din ng aktor na mas mahirap ang mag-dub kaysa umarte sa harap ng camera.
“Siguro ito 'yung pinakamahirap for me kasi ilang years na ako nag-a-acting sa TV. Tsaka mas sanay ako 'yung sa 'pag sa TV mas relax lang,” paliwanag niya.
Aminado si Martin na nahirapan siya sa pagbato ng mga linya dahil kasabay nito ang pagbabasa niya ng script.
“Dito sa dubbing kasi may ibang actor, e. Susundan mo lang 'yung boses with timing. Tapos gustuhin ko man umarte sa mukha, pero ang hirap kasi nagbabasa ka ng lines, tapos 'yung boses mo ina-acting mo,” patuloy niya.
Itinuturing din ni Martin na mapalad siyang si Judas ang napunta sa kaniyang role.
“Kasi interesting ang character ni Judas kasi 'di ba sa pagkakaalam natin siya 'yung nag-traydor kay Jesus kapalit ng silver coins. Kasi kung gagawin ko 'yung role sa TV, wow! Gustung-gusto ko ng role na Judas at napakarami nang roles na ganyan ang nagawa ko sa TV,” aniya.
Mapapanood ang “Jesus His Life: Judas” sa Good Friday, April 10, 5:00 p.m sa GMA-7.--FRJ, GMA News
