Isang malusog na baby girl ang isinilang ng GMA broadcast journalist na si Mav Gonzales.

Sa Facebook post nitong Lunes, ibinahagi ng Kapuso journalist na hindi niya inaasahang manganganak na siya dahil nagpunta siya sa ospital para sa isang simpleng check-up lang sana.

“I was sitting on the hospital bed just for a check-up,” saad niya. “I felt something leaking. My water bag [broke] during an internal exam.”

Ayon kay Mav, kaagad niyang tinawag ang kaniyang asawa na si Matthew Valeña para ma-admit na siya sa ospital.

“He was also so confused and shocked, but he did the best a first-time dad could do,” dagdag niya.

Sa simula, inilarawan ni Mav na “madali” lamang ang kaniyang labor at may “mild contractions" lang. Ngunit nagkaroon ng komplikasyon nang hindi maayos na bumababa ang sanggol.

“We tried different positions. In the tub. Squatting. Sitting [on] a stool. Lying sideways on the bed,” saad niya. “She still wasn’t moving.”

“And then the doctor said my bladder is already bleeding because the baby’s head was bumping into it,” dagdag niya.

Ikinuwento rin ni Mav ang mahirap niyang karanasan sa epidural, na inilarawan niya na, “worst experience of my life, not being able to feel or move my legs.”

Nailabas niya kalaunan ang sanggol sa tulong ng “vacuum” procedure. Ibinahagi din ni Mav na maikli ang pusod ng kanyang anak, at inihalintulad niya ang karanasan na “playing a tug of war between the outside world and her placenta.”

Pagkatapos manganak, sinabi ni Mav na agad siyang nakaranas ng komplikasyon kabilang ang pagsusuka, pagdurugo, at nawalan ng malay.

“While I was dipping in and out of consciousness, I saw Matt on the couch in his jeans and silly hair cover holding our daughter,” saad niya. “He smiled at me.”

“I remember praying, 'God, please don’t let me die. Not now that I just got my family,'” patuloy niya. “I hadn’t even bonded with my baby yet.”

Sinabi ni Mav na kalaunan ay nakarekober din siya matapos mabigyan ng blood transfusions at iba pang gamutan.

“God heard my prayer,” sabi ni Mav.

“A body warmer, several stitches and blood transfusions after, I finally got to hold the greatest blessing Matt and I have ever received — a 7.5lb chubby cheeked baby Maya,” ayon kay Mav.

Inanunsyo ng mag-asawa ang pagbubuntis ni Mav noong Disyembre 2025, dalawang buwan matapos silang ikasal.—Hermes Joy Tunac/FRJ GMA News